1 Corinthians 2
Polo'a Kalaisi'mo malipu yosale'mo nili aite'a ali'a he ti'a ate'naya kavafe'mo ava gemo hu'niya gemae
1Konaga'nimogitapae, hu'na, Nagaemo Gotitegati'mo ali'nova gemo ae'na hakalo hu'na lapa paisuvafe'mo lapakaetegamo u'nae'mo muki ge'amo alagepa hu'a afi'ne'a nehaya vaya'mogimo nehaya agufa gemo hu'na afite'na age'nova ge'nileti'mo lapa opai'nove. 2Hogote'na naipafi'mo, apakae'e'mo u'na magokepi lokae'na mai'ne'nae'mo muki kavafe'mo nage kani'na atale'ne'na Yesu Kalaisifeke'mo nagesamo afi'ne'na Yesu Kalaisi'mo malipu yosale'mo nili aite'a ali'a he ti'a ate'naya kavafeke'mo nagesamo afi'ne'na ae'na hakalo huguve, hu'na lokiya vai'na nagesamo afi'nove. 3Nagaemo lapakaetegamo u'nae'mo lokiya o'vai'na koli nehu'nae'mo lusi kava hu'na atete hu'na mai'nove. 4Nagaemo ma mopafi vaya'mogi afite'a age'naya geleti'mo apakesamo nefaiya agufa geleti'mo ge osuge ae'na hakalo hu'na lapa opaige hu'nova'monanafa nagaemo lapa nepaugeno'ae'mo Goti Auneme'amo'mo himamu'aleti'mo lapaipafi'mo alino lapave li'nigetapae'mo, alagi lama ge hane'niye, hutapa hu'nae. 5Lapakaemo afite'a age'naya vaya'mogi nehaya agufa ge'apie'mo lapakesamo afitapae'mo, nahau vaigiye, hutapa osutapa Goti himamu'aeke'mo lapakesa afita fatago nehutapae'mo, nahau vaigiye, hutapa hisayafe'mae.Goti'a afiteno age'niya kavafe'mo ava gemo hu'niya gemae
6Ani agufa gemo nehaya'monanafa alopa vaya'aife'mo afiteta age'nona geleti'mo hapa nepaune. Ma mopafi vaya'mogi afite'a age'naya agufa geleti'mo hapa opaige ma mopafi'mo mai'ne'a yagai'a ne'apataya vaya'mogi afite'a age'naya agufa geleti'mo hapa opaige huta hapa nopaune. Henaga'amo apakaemo ina agufa vaya'mo maigae. 7Hapa nopauna'monanafa Goti'a alino fala ki male'niyanage'a afa'a o'agesaya ge'aleti'mo Goti'a afiteno age'niya geleti'mo hapa nepaune. Goti'a ma mopamo alo osu'neno'ae'mo ha le konali ya'amo alisunafe'mo ani gemo hu male'niye. 8Muki ma mopafi'mo mai'ne'a yagai'a ne'apataya vaya'mogimo ani afiteno age'niya ge'amo alagi o'afi'nae. Afi'naesinana ha le konali Ala kava ne'mo malipu yosale'mo nili aite'a ali'a he ti'a o'ate'naesine. 9O'afi'naya'monanafa avo'mo kae male'niya gemo'mo huno'ae'mo,Goti'a agaefe'mo hapau apayamopafi'mo hapau'niya vaya'mo alo huno apate'niya ya'mo muki vaya'mogi apaulagafati'mo o'agege apakesafati'mo o'afige hu'a apakesa o'afi'naya ya'mo hane'niye,
huno hu'niye. 10O'age'naya'monanafa Goti'a Auneme'aleti'mo alino lave li'niye. Goti Auneme'amoke'mo Goti agesafi'mo fala kino nehaneya ge'amo ne'ageya'mofe'mae. 11Vaya'mogimo mago vekamo'a agesamo ne'afiya kava'amo no'agaya'monanafa agai'a auneme'amoke'mo ne'age. Ani kava hu'a vaya'mogimo Goti'a agesamo ne'afiya kava'amo no'agaya'monanafa agai'a Auneme'amoke'mo ne'age. 12Lagaemo Goti'a fiku laha maeno lami'niya ya'mo agesunafe'mo ma mopafi vaya'ai apaune'apame'mo o'ali'nopa Gotitegati'mo Auneme'ageke'mo ali'none. 13Lagaemo ma mopafi vaya'mogi magoke magoke gemo ali'a laya male'naya ge'aleti'mo osuta Goti Auneme'amo'mo magoke magoke gemo alino nelamino alino laya male'niya ge'aleti'mo nehune. Lagaemo apaune'apametefe'mo Goti Auneme'amo'mo alino lami'niya geleti'mo alita apaya ne'malone. 14Goti Auneme'amo o'ali'a afa'a ne'maiya vaya'mogimo Goti Auneme'amo'mo alino ne'apamiya ge'ae'mo ohapau'nige'a no'afiye. Apakaemo, negi nagi ge, hu'a apakesamo ne'afiye. Auneme'aletike'mo afi'a aeto hisaya agufa gemo hane'niya'mofe'mo afa'a afi'a aeto osugae. 15Afa'a o'afigaya'monanafa Goti Auneme'amo ali'naya vaya'mogige'mo muki ge'amo afi'a ali'a fako hu'a ne'ataya'monanafa afa vaya'mogimo apakaemo afa'a ali'a fako hu'a o'apategae. 16Ani kavatefe'mo Goti ge'amo'mo huno'ae'mo,Ina lagimo Ala kava ne'mo'a agesa ne'afiya agesamo agete'a afa'a ali'a aya malegae, huno hu'niye. Ali'a aya malesaya agufa vaya'mo alagi o'mai'naya'monanafa lagaemo Kalaisi aipa agesamo ali'none.
Copyright information for
KYG